"Ang Sinulog usa ka relihiyoshong kalihukan. Sa ato pa, makahimuot ug makapahimaya kini sa Dios." Mao tingali kini ang gihunahuna nimo. Basin mao kini ang katarungan nganong [moapil] ka niini. Pero hunahunaa pag-ayo kini - dili tanang relihiyosong kasaulogan makapahimuot sa diyos. Gani daghan kanila ang gikasuk-an Niya. Ngano man? Tungod kay dili gyud sila makapahimaya Kaniya. Giingon sa Dios diha sa Biblia, "Busa, kon magakaon kamo o magainom, o magbuhat sa bisan unsa, buhata ninyo kining tanan aron sa paghimaya sa Dios.(1 Corinto 10:31)

Makapahimaya ba gyud sa Dios and Sinulog? Si bisan kinsang isog ug matinud-anong mohuna-huna pag-ayo niining pangutanaha makaingon gyud nga dili. Ngano?

1. Ang walay pugong-pugong nga pagsaulog ug paghubog-hubog dili makahimaya sa Dios. Panahon sa Sinulog dunay grabeng paghudyaka ug daghan kaayo ang mangahubog. Dili ika limud nga ang bino ug ubang butang makahubog maoy nakalagsik sa daghang nanambong - dili ang Balaang Espiritu sa Dios. Pero unsay gisulti sa Dios? Diha sa Biblia giingon Niya, "ug ayaw kamo pagkahubog ug bino, kay kana maoy pagpatuyang; kundili magpapuno hinuon kamog espiritu' (Efeso 5:18). Kinahanglan ang Espiritu Santo mao ang mopalagsik ug mopugong sa atong mga kinabuhi ug gimbuhaton, dili ang bino o ubang butang makahubog. Unsa man diay mahitabo kung mahubog na ang tawo? Kini mohatod ngadto sa "pagpatuyang" - usa ka kinaiya nga wala nay igong pagtagad o paghunahuna asa moresulta ang gibuhat.

2. Ang paggamit sa kalibutanon kaayong mga awit nga nagtimaan sa Sinulog dili makapahimaya sa Dios. Kining mga awita ug musika dili makapadasig sa malipayong paghatod ug pagpasalamat sa Dios. Gani, sila makapukaw sa dili maayong mga pagbati. Busa unsaon man niini paghimaya sa Dios? Ang Biblia nag-ingon. "Pagsinultihay kamo, ang usa sa usa, sa mga pulong, sa mga salmo ug sa mga alawiton ug sa mga awit nga espirituhanon, nga manag-awit ug managtogtog nga magadayeg sa Ginoo uban sa bug-os ninyong kasingkasing, nga sa kanunay magpasalamat kamo sa Dios Amahan tungod sa tanang mga butang, sa ngalan sa atong Ginoong Jesu-kristo. (Efeso 5:15-20).

3. Ang kaulag dili makapahimaya sa Dios. Unsay nagdani sa daghan (dili tanan) aron motambong sa Sinulog? Dili ikalimud (daghan ang maulawng moangkon) nga ang kaulag ug dili ang tinuod nga gugma maoy hinungdan sa ilang pagtambong. Dili kini ikahibulong kay ingon man niini ang tanang relihiyosong pagpatuyang kaniadto o karon. Ang kalainan naa ra sa kagrabihon. Ang sekswal nga pagdani ug pagilok importante kaayong bahin nila. Ang Sinulog nabantog sa mga sayaw nga makahagit sa sekswal nga tinguha ug hilas nga mga sinina. Gani dili na man sekreto nga daghan mga "motel" o balay abutanan mga gituyo paghimo alang sa gidili nga paghilawas nagkapuliki sa dili pa o panahon sa Sinulog. Busa, unsaon man paghimaya sa Dios? Gihimo sa Dios ang paghilawas. Ang pagpahimulos niini diha sa kaminyoon balaan ug makapahimuot sa Dios (tan-awa Prov 5:15-21). Pero ang paghilawas gawas sa kaminyoon gikasuk-an sa Dios ug dili makapahimaya Kaniya! (tan-awa Heb. 13:4; mat 5:27-30; Efe 5:1-7).

4. Ang pagpasidungog sa imahen sa Sto. Niño dili makapahimaya sa Dios. Nasentro sa kasaulogan sa Sinulog mao ang pagpasidunog sa imahen sa Sto. Niño. Makapahimaya ba kini sa Dios? Ang Dios nag-ingon diha sa Biblia, "Ako mao ang Ginoo, kana mao ang akong ngalan; dili ko gayud ihatag kang bisan kinsa ang Akong himaya, ni ang Akong dungog ngadto sa linilok nga larawan." (Isa. 42:8). Inay pasidungan ang tinuod ug buhing Dios, kinsa dili makita, ug ang Ginoong Jesu-Kristo, ang Dios nga nagpakatawo, kinsa atua karon sa langit, ang mga tawo tua na hinuon mohatag sa dungog ug himaya sa usa ka kinulit nga larawan. Bisan pa kung ang imahen sa Sto. Niño nga gituohang nagrepresentar ni Jesus (usa ka kataw-anang butang tungod kay wala gyoy angayng maghunahuna nga ang Ginoong Jesus kinsa tua na karon sa langit samag dagway sa maong imahen), kini dili makapahimaya sa Dios. Tungod kay ang himaya ug dungog nga alang ra sa Dios tua na hinuon ihatag sa usa ka kinulit nga larawan. Usa kini ka butang nga gikasuk-an sa Dios (tan-awa usab Isa. 40:18-20; Exo 20:4-6; Deut 4:15-18; exo 32:1 ug mosunod).

Kung gihunahuna mo nga alang sa himaya sa Dios ang Sinulog, galimbong ka ra sa imong kaugalingon. Biyai kining sayupa ug simbaha ang Dios sa paagi nga giingon Niya. Klaro kining gisulti ni Ginoong jesus, "Ang Dios espiritu, ug ang magsimba Kaniya kinahanglan managsimba diha sa espirtu ug sa kamatuoran" (Juan 4:24) Ang pagsimba nga gisugo sa Dios espirituhanon (sa espiritu) ug biblikanhon (sa kamatuoran). Mao ra kining klaseha sa pagsimba nga makapahimuot ug makapahimaya sa Dios.